FINANCE

10個上車置業小貼士

如果你問香港既打工仔有咩夢想,相信十個有九個都會答你:「想買樓」。對於想上車既人黎講,一路睇樓,一路想像自己喺嗰度生活,例如喺露台睇風景,或者點樣裝修佈置屋企,都夠晒雀躍。更莫講話擁有屬於自己既物業,可以話係全世界最令人興奮既事!不過,做決定既時候,好易會被想像中既美好未來影響,令到情感蒙蔽左理智,搞到好想即刻同經紀落訂,下個月就搬入去。但記得停一停,諗一諗,買樓會令到你喺未來幾十年都會比層樓綁住,所以一定要計劃好啲先得!

以下有 10個上車置業小貼士  ,記得上車前一定要睇左先!

1. 時機
機價升跌受好多野影響,包括樓盤供求同埋普遍既經濟狀況。當然啦,最理想既情況係樓市跌先入市。如果你預計會有新既政策令樓市喺黎緊一兩年跌,但宜家睇啱左個比較貴既盤,最好就唔好入市住。你可以用呢段時間儲多啲錢,咁第時就負擔得起高啲既首期。

2. 長遠用途
第一次置業既物業多數都係用黎自住。但你有冇諗過長遠既計劃?如果你計劃第時賣返層樓出去既話,物業既位置就好重要,因為會直接影響升值能力。所以㨂樓既時候就要重視呢個因素多啲。

3. 小而美,大而全?
雖然唔少人都會想間樓越大越好,但越大多數等於越貴!買樓既時候好常見既一個掙扎就係:兩間樓既價錢同其他條件都差唔多,但一間面積較大,所以唔知點算好。呢個時候一定會好有衝動想㨂間大啲既屋,雖然喺大多數情況下,咁做都係一個精明選擇;不過,要記住間屋越大,就要用越多錢裝修同維持,連電費都貴啲啦!

4. 市場對租盤既需求
如果你層樓打算租出去,咁就要諗埋市場對租盤既需求。就算市場既需求高,都唔好指意即刻租到出去,同埋好快可以用租金黎還按揭。

5. 公屋/居屋
買樓唔一定買私樓,可以考慮埋政府不同既房屋計劃。買樓之前,記得睇下自己合唔合資格申請公屋或者居屋,或者搵下一啲補左地價既樓盤。

6. 比較不同按揭計劃
第一次申請按揭既上車一族多數都會傾向去相熟既銀行申請按揭。不過市面上咁多銀行提供按揭計劃,只要你肯做下功課,比較唔同按揭計劃,就可以慳返好多利息。

7. 通脹
無錯,買樓都同通脹有好大關係!你應該因應通脹趨勢,決定還款期既長短。如果通脹高企,將來還錢既成本相對黎講都會低啲,咁較長既還款期(例如30年左右)就會比較抵。相反,還款期短啲既話,利息支出都會少啲。

8. 未雨綢繆
當你孭住一層樓,儲一筆應急用既錢就相當重要。就算你touchwood突然間冇左主要收入來源,都有筆錢可以供按揭呀嘛。筆錢最好夠交幾個月按揭供款,同埋喺你搵到份新工之前應付到家庭生活開支。

9. 地產經紀
雖然你可以自己處理晒買樓既野,但搵經紀幫你既話,可以令到成個過程輕鬆好多。經紀會引導你完成買樓既過程,同埋比意見你,例如點樣殺價。所以,最好經朋友或者同事介紹,搵一個有經驗同埋你信得過既經紀,令自己唔使咁頻撲。

10. 預算額外開支
你可能會太注重間樓既成交價,而忽略左其他相關既支出,例如律師費、印花稅等等⋯重有記得,經紀都要收佣架!所以計自己最多可以負擔幾多錢既時候,要預埋呢啲支出。

---
同任何理財決定一樣,唔好比自己既情感蒙蔽理智!尤其當你係上車買家,一切都好新奇,好易會中伏!盡量了解所有相關既資料,考慮唔同選項,再三思而後行,當然包括最重要既按揭。保持頭腦清醒同埋耐心啲,就可以作出既合適,長遠黎講又有利既選擇。
---
即上MoneyHero.com.hk,瀏覽更多金融產品有關既資料!想知多啲慳錢貼士同理財建議,就要留意MoneyHero blog,同埋緊貼MoneyHero facebook page!

上車時機 公屋 居屋 置業 買樓 通脹
Moneyhero