FINANCE

7個慳錢裝身方法

雖然大家買衫既次數唔會多得過你去超級市場買野,但買衫應該佔左支出既好大部分。所以如果可以喺呢方面使少啲既話,加埋都慳唔少!除左可能等減價,有信用卡優惠先買野,或者去outlet買衫之外,其實重有一啲小技巧可以幫你慳啲錢。快啲睇下MoneyHero.com.hk幫你諗到既7個慳錢裝身方法!

交換大會

快啲同朋友搞個PARTY,拎晒自己唔要既衫出黎交換啦。咁樣除左可以令個衣櫃多返啲空位之外,重可以試下啲你平時未必會買既衫,話唔定會有意外效果!至於交換唔出既衫就可以捐去舊衣回收,順便儲下人品,好過就咁扔左佢呀!

先賣後買

相信唔少人個衣櫃雖然已經塞到爆晒,但都係停唔到手繼續買。要解決呢個問題,除左交換衫或者捐衫之外,另一個選擇就係將啲衫賣出去啦。香港近排都開始興起買賣二手衫,二手衫鋪或者二手衫社企其實好方便企理。咁做重可以賺返少少錢,咁買新衫都手鬆啲嘛!

免縫補衫

好多時啲衫可能只係爛左少少,但又怕比人睇到就唔敢著,變左扔又唔係唔扔又唔係。拎件衫去補又要錢,自己用針線縫又麻煩。試下呢種叫做”Bostik Sew No-More”既膠水,唔單止可以痴返埋布料、皮、人造皮,用完重可以放入洗衣機洗,真係好神奇!

用舊造新

打算賣出去或者送出去既衣物,其實可以自己加啲巧思,將佢地改頭換面!例如唔要既襪,如果剪左腳板個位,卷起佢就可以用黎紥頭髮啦。唔要既舊T恤就可以剪幾剪,變成今季最興既短身T恤或者一字肩T恤,著出新感覺。

再見單隻襪

相信大家都試過啲襪洗下又唔見一隻,洗下又唔見一隻;或者你想著既時候永遠都搵唔到另一隻襪。其實好簡單,洗衫時啲襪放晒入洗衣袋,就唔怕唔見啦。咁就唔使成日曬衫再買過對襪啦!

洗衫標籤解碼

想啲衫襟著啲,就要好好睇清楚洗衫標籤啦。牛仔褲同外套可以著多幾次先洗,有啲牛仔褲sales甚至叫你唔好洗,怕洗壞左個洗水同個shape嘛!所以如果你小心啲,就可以延長佢地既壽命。其實好多符號都唔難明,例如上面第4個係指唔可以熨。其他同保護衣物有關既符號包括第二個符號(三角型)或者第五個同最後一個符號(圓型)。如果三角型加一個交叉即係唔好用漂白水洗,圓型加交叉就即係唔好乾洗。

善用Marker

如果你既皮製衣物,例如鞋或者衫有少少刮花左既話,其實可以用marker輕輕劃一劃,就唔覺架啦!咁就慳返唔使買新野啦。

(文章由 MoneyHero.com.hk 提供:7個慳錢裝身方法

慳錢 裝身
Moneyhero